تاند:( يکشنبه، د ميزان اتلسمه ) د افغانستان د سولې لپاره د امريکا متحده ايالاتو د بهرنيو چارو وزارت ځانګړي استازي زلمي خليلزاد په عاجل ډول په افغانستان کې د نجونو د ښوونځيو د بېرته پرانیستل کیدو غوښتنه کړې ده.
نوموړي دا غوښتنه پرون ناوخته پخپل ټویټر پاڼه کې کړې او ورسره يې په يو شمېر ولايتونو کې د نجونو د تړل شويو ښوونځيو د پرانيستل کيدو د راپورونو هرکلی کړی دی.
طالبانو خه باندي يوه مياشت کیږي، چې له شپږم ټولګي څخه د نجونو پر زده کړو بندیز لګولی دی.
دوی دغه راز، دندو ته هم د ښځينه وو د ورتګ مخنیوی کړی دی.
د افغان سولې لپاره د امريکا ځانګړي استازي خلیلزاد په يوه بل ټویټ کې د کندوز ولايت وروستۍ پېښه هم غندلې.
دا پېښه، چې د کندوز د اهل تشيعو پر یوه جومات د ځانمرګي برید له کبله رامنځته شو، تر سلو ډېر کسان پکې شهیدان او سلګونه نور ټپيان شوي.
خلیلزاد ويلي، چې هېواد يې د يادې پېښې د عاملانو محاکمې ته کاږل غواړي.
د هغه په باور، افغانان حق لري چې په سوله کې ژوند وکړي.
بل لور ته، د ايران مذهبي مشر ایت الله علي خامنه يې هم د کندوز پر اهل تشيعو د جمعې ورځې ځانمرګی برید غندلی او د عاملينو د مجازات غوښتنه يې کړې ده.
د ياد شوي برید مسؤولیت داعش ډلې پر غاړه اخيستی.