تاند:( دوشنبه، د ميزان پینځمه) د طالبانو اسلامي امارت د کندهار د لسګونو هغو پلونو د بيرته جوړولو خبر ورکړی، چې دوی یې په ويجاړۍ تورن دي.
باختر خبري اژانس، چې اوس د طالبانو لپاره نشرات کوي، په يوه راپور کې لیکلي چې دا پلونه په کندهار کې د طالبانو د ټولګټو چارو رياست له لوري په اساسي رغول کیږي.
سرچينې دا نه دي ویلي، چې ياد شوي پلونه ولې، کله او د چا لخوا ويجاړ شوي؟
مخکې د اوږدو کلونو جګړه کې طالبان تورن وو، چې بهرنيو او افغان ځواکونو ته د ګرځيدو د ستونزمنولو او تلفاتو په موخه يې پلچکونه، سړکونه، پلونه او ځينې وخت د وېره خورونې او خپل حضور ښودلو لپاره ان ښوونځي او روغتونونه ويجاړول.