تاند:( جمعه، د میزان ۲مه) د افغانستان د ملي کنګرې ګوند مشر عبدالطیف پدرام وایي، چې د طالبانو د امارت مخالفین به زر په افغانستان کې موازي دولت اعلان کړي.
نوموړي په یوه ټلویزوني مرکه کې د دغه دولت د جوړیدو ځای افغانستان وباله او ویې ویل، چې تشکیلات به یې زر اعلان کړل شي.
پدرام دا هم ویلي، چې د طالبانو ډېری مخالفین د احمد مسعود په مشرۍ د مقاومت په ملي جبهه کې ټول شوي او کلیشه یي سیاستوالو ته دغه جبهه کې ځای نه دی ورکړل شوی.
د طالبانو د اسلامي امارت د کابینې له اعلان وروسته، ملي مقاومت بهیر هم په یوه اعلامیه کې د دوی پر وړاندې د بل دولت د جوړیدو خبر ورکړی و.
د طالبانو د تېرې واکمنۍ پرمهال هم افغانستان د دوی پر وړاندې بل موازي دولت درلود، چې مشري یې برهان الدین رباني کوله.
د ملګرو ملتونو په ګډون یو شمېر نړیوالو سازمانونو او ګڼو هېوادونو د طالبانو د دولت پرځای د رباني په مشرۍ دولت په رسمیت پېژانده.