تاند (سې شنبه، د سنبلې ۹) د امریکا پوځ بریتانیايي ځواکونه په دې تورن کړي چې د تېرې اوونۍ د پنجشنبې د ورځې د حملې د مرګ ژوبلو د زیاتېدا سبب شوي دي.
د امریکايي او بریتانیايي رسنیو د راپور له مخې، د تېرې پنجشنبې په ورځ / سنبله ۴/ د کابل د هوايي ډګر په خوله کې د داعش تر انتحاري برید مخکې امریکايي قوماندانانو غوښتل چې د هوايي ډګر دروازې بندې کړي خو دا پرېکړه د دې لپاره بېرته واخیستل شوه چې بریتانیايي ځواکونو غوښتل چې له افغانستانه ډېر کسان وباسي او په نتیجه کې یې د داعش انتحاري حمله کوونکي له فرصته په استفادې ۱۷۰ افغانان او ۱۳ امریکايي پوځیان ووژل.
د امریکا پوځ مخکې تر مخکې د استخباراتي معلوماتو پر اساس د داعش د حملې اټکل کړی و.
خو د بریتانیا دفاع وزارت نن د امریکا د پوځ دا ادعا رد کړه چې ګنې د دوی د ځواکونو له لاسه داعش وتوانېده چې د کابل په هوايي ډګر کې انتحاري برید وکړي.