تاند- د یوه افغان ماشوم، چې له کابل څخه پولنډ ته رسول شوی و، د زهرجنې پوڅکۍ د خوړلو له کبله ځیګر یا ینه له کاره لوېدلې ده.
د پولنډ د پلازمېنې وارسا ښاروال ارتور څیسینسکي پر خلکو غږ کړی چې که څوک خپل ځیګر ورته عطیه کړي نو د پیوند له لارې به د ماشوم ژوند وژغورل شي.
ماشوم د وارسا په یوه روغتون کې دی او ډاکتران وايي چې ځیګر یې پیوند ته اړتیا لري.
ټاکل شوې وه چې ماشوم د کورنۍ له غړیو سره یې په بل ټپال کې بریتانیا ته لېږدول شوي وای.
په اروپا کې یو شمېر خلک تر مړینې مخکې وصیت کوي چې د بدن غړي دې یې هغو کسانو ته ورکړل شي چې ورته اړتیا لري.
تمه ده چې افغان ماشوم ته د چا له لوري عطیه شوی ځیګر پیدا شي.