تاند(یکشنبه، د سنبلې ۷) یوې بلې افغان ښځې، چې له کابل څخه بریتانیا ته روانه وه، له مځکې ۳۰ زره فوټه لوړ په الوتکه کې ماشومه وزېږوله.
په لوړه ارتفاع کې د هوا د فشار د ټیټوالي له کبله د ماشوم د زېږېدو چانس زیاتېږي او له همدې کبله اکثره هوايي شرکتونه اومیندوارو ښځو په تېره بیا هغو ته چې ماشوم یې تر شپږ میاشتو زیات وخت په نس کې وي، د هوايي سفر د کولو سپارښتنه کوي.
ترکش ایرلاین هوايي شرکت وايي، ۲۶ کلنې سمن نوري ته، چې وړمه ورځ له کابله په وتلو بریالۍ شوې وه، هغه مهال تکلیف پېښ شو چې د دغه هوايي شرکت په الوتکه کې له دوبۍ څخه د بریتانیا برمنګم ته روانه وه.
ترکش ایرلاین وايي چې په الوتکه کې هیڅ ډاکتر نه و.
مور او پلار پر خپلې دې ماشومې حوا نوم کېښود.
د دوی الوتکه په ځايي وخت په ۱۱ بجې او ۴۵ دقیقې د برمنګم پر هوايي ډګر کښېناسته. د ماشومې او مور روغتیايي وضعیت بیخي ښه دی.
تر دې مخکې یوې افغان مېرمنې د امریکا د پوځ په الوتکه کې، چې جرمني ته روانه وه، ماشوم زېږولی و. همداراز دوو نورو افغان مېرمنو جرمني ته له رسېدو سره سم، ماشومان وزېږول.
د اګست له ۱۵ تراوسه پورې تر ۱۱۷ زره ډېر افغانان له کابل څخه بهرنیو هیوادونو ته ایستل شوي دي.