تاند (چهارشنبه، د اسد ۲۷) د امریکا د بهرنیو چارو وزارت ویاند په یوه خبري کنفرانس کې د خبرو پر مهال ویلي، چې دوی له افغانستان د خپلو ديپلوماتانو او سفارت د کارکوونکو د ایستلو پروسه بشپړه کړې ده.
د یاد وزارت ویاند زیاته کړې، چې یوه ډله ديپلوماتان لا هم په افغانستان کې حضور لري.
د سرچینې په خبره دغه ديپلوماتان به امریکايي اتباعو او پاتې وګړو په ایستلو کې مرسته کوي.
امریکايي حکومت دغه راز ویلي، چې تر اوسه یې د طالبانو د حکومت په رسمیت پېژندلو په اړه فکر نه دی کړی او نه هم په دې اړه بېړه لري.
سرچینه زیاتوي، چې دوی د افغانستان وضعیت څاري او د طالبانو کړنو ته په کتو به پرېکړه کوي.
تمریکا اوس له دې هم ډاډمنه ده چې سفارت یې امن دی.
بل لورته د فرانسې خبري آژانس د امریکا د بهرنیو چارو وزارت له قوله ویلي، که چیرې امریکا ډاډ تر لاسه کړي چې افغانستان کې خوندي دی نو د اګست له ۳۱ مې وروسته به هم خپل دیپلوماتیک فعالیت ته دوام ورکړي.
د اروپایي اتحادیې د بهرنیو چارو رئیس هم ویلي چې اروپایي اتحادیه چمتو ده طالبانو سره ګډ کار وکړي،خو په دې شرط چې د ټولو په خوښه ټولشموله حکومت جوړ، مدني آزادۍ، د ښځو او بشر حقونو ته پکې درناوی خوندي وي.