تاند (دوشنبه د اسد ۲۵مه) د امریکا ددفاع وزارت وایي د کابل هوايي ډګر د خوندي ساتلو لپاره یې زر نور سرتېري هم رالېږلي دي.
د امریکا ددفاع وزیر جنرال لویډ آسټن په تازه څرګندونو کې ویلي چې دوی د کابل له هوایي ډګر د ډيپلوماتانو د خوندي ایستلو او په دغه ډګر کې د نظم ساتلو لپاره زر کسه نور هم ځای پر ځای کړي دي.
د آسټن په خبره په دې سره په کابل کې د امریکایي ځواکونو شمېر شپږو زرو ته ورسېد.
امریکا وایي چې دغه کسان په موقتي توګه په کابل کې ځای پر ځای شوي دي او د امریکايي وګړو او ډيپلوماتانو تر ایستلو وروسته به دوی هم له افغانستانه ووځي.
تر دې وړاندې دلته د شته امریکایي ځواکونو شمېر پنځو زرو ته رسېده چې ټول د کابل په هوايي ډګر کې ځای پر ځای شوي دي.