تاند (یکشنبه د اسد ۲۴مه) په دایکندي کې امنیتي سرچینې وايي چې نن سهار دغه ولایت د طالبانو لاس ته ولوېد.
د دایکندي د ولایتي شورا وکیل غیرت علي جوهري ویلي چې د دې ولایت امنیه قومندانۍ او د ولایت مقام تېره شپه له کومې وسله والې نښتې پرته تخلیه او نن سهار طالبان ښار ته ننوتل.
د طالبانو ویاند ذبیح الله مجاهد هم پر خپل ټویټر لیکلي چې دایکندي ولایت په بشپړه توګه د دوی لاسته لوېدلی دی.
د غیرت علي جوهري په خبره چې د دایکندي زندان ټول ۱۸۰ بندیان هم په تېښته بریالي شوي دي.
د هغه په خبره چې اوسمهال سیمه ییزو مسؤلینو په دغه ولایت کې څو ولسوالۍ پریښې خو طالبان لا هلته نه دي رسېدلي.
همدارنګه طالبان وايي چې د میدن وردګ ولایت مرکز میدان ښار یې هم نیولی دی.
طالب ویاند ذبیح الله مجاهد وايي چې د دغه ولایت مقام، امنیه قومندانۍ، مرکزي محبس او ټول دولتي تأسیسات په بشپړه توګه د دوی په کنټرول کې دي.
په همدې حال کې ویل کېږي چې د بامیان ولایت مقام او د امنیه قومندانۍ ودانۍ د طالبانو او امنيتي ځواکونو په نشتون کې د ولسي خلکو له خوا چور شوي دي.
دغه راز په ختیځ کې د ۲۰۱ سېلاب قول اردو د چور خبر هم ورکړل شوی دی. د سرچینو په خبره چې ولسي خلک ۲۰۱ سېلاب قول اردو ته د ننه شوي او چور یې ګډ کړی دی.