تاند( دوشنبه د اسد ۱۸ مه) افغان ځواکونو د تخار ولایت فرخار او ورسج ولسوالۍ له طالبانو بېرته نیولي دي.
امنیتي چارواکي وایي، چې پرون افغان امنیتي ځواکونه په یوه تکتیکي شاتګ سره د تخار ولایت له مرکز تالقان ښار نه ووتل، او د دغه ولایت د فرخار او ورسج ولسوالیو پر لور یې عملیات پېل کړل او دغه ولسوالۍ یې بېرته ونیولې.
امنیتي چارواکي زیاتوي، چې اوس افغان ځواکونه پر تالقان ښار د چاڼیزو عملیاتو د پلان پر جوړولو لګیا دي او ډیر ژر به دغه ښار له طالبانو بېرته ونیسي.
د امنیتي چارواکو په وینا،د فرخار او ورسج ولسوالیو د نیولو په عملیاتو کې طالبانو ته درنه مرګ ژوبله اوښتې ده.
بل خوا د تخار ولایت یو شمېر اوسېدونکي د امنیتي ځواکونو په عملیاتو کې د هوایي ځواکونو رول اغېزناک ګڼي او له حکومته غواړي،چې په دغه ولایت کې د افغان ځواکونو هوايي ملاتړ زیات کړي.
اخوا عبدالرشید دوستم د هېواد د شمال د وروستیو پېښو په غبرګون کې ویلي دي،چې په شمالي ولایتونو کې وضعیت ډیر ژر بدلېدونکی دی.
د ده په وینا، طالبان به ډير ژر له سختې ماتې سره مخ شي.