تاند(پنجشنبه، اسد١۴) – د افغان حکومت په غوښتنه سبا د جمعې په ورځ د ملګرو ملتونو امنیت شورا د هند تر مشرۍ لاندې د افغانستان پر وضعیت غونډه کوي.
د ملګرو ملتونو امنیت شورا دغه ناسته وروسته له هغې جوړېږي چې د افغانستان د بهرنیو چارو وزیر محمد حنیف اتمر تازه له خپل هندي سيال جي شنکر سره د دې شورا د بېړنۍ ناستې د جوړېدو غوښتنه وکړه.
د ملګرو ملتونو امنیت شورا دوره يي مشري اوس د هند پر غاړه ده او سبا به په ملګرو ملتونو امنیت شورا کې د دې هېواد دايمي استازى د دې ناستې مشري وکړي.
په امریکا کې د هند سفیر ټي ايس ټروماټي په يوه ټويټ کې وویل: “د ملګرو ملتونو امنیت شورا سبا د اګست په 6مه د هند تر مشرۍ لاندې د افغانستان اوسنى وضعیت تر بحث لاندې نيسي.”
د افغانستان د بهرنیو چارو وزیر محمد حنیف اتمر وايي، ملګري ملتونه او نړیواله ټولنه باید مهم رول ولوبوي څو په افغانستان کې د طالبانو له لوري پيل شوى بې رحمه تاوتریخوالى او تراژيدي پاى ته ورسېږي.
ښاغلي اتمر د هند له لوري د ملګرو ملتونو اوسنى دوره يي رياست وستايه.
له افغانستانه د امریکایي او ناټو ځواکونو په وتو له تېرو څو میاشتو راهیسې د افغان ځواکونو او وسله والو طالبانو ترمنځ جګړو زور اخيستى دى.
ښاغلي ټروماټي وویل، د ملګرو ملتونو امنیت شورا ټولو غړو لپاره د افغانستان وضعیت خورا د اندېښنې وړ دى او زياتوي: “مونږ په وروستیو ورځو کې وليدل چې په افغانستان کې تاوتریخوالى زيات شوى دى.”
هغه همدارنګه وویل:” مونږ يو خپلواک. سوله ييز، ډيموکرات او باثباته افغانستان غواړو. هند د هرې هغې هڅې ملاتړ کوي چې افغانستان ته سوله، امنیت او ثبات راولي.”
نوموړي زیاته کړه، هدفي وژنې او د تاوتریخوالو زياتوالى جدي اندېښنې وړ ده او باید ژر تر ژره پاى ته ورسېږي، وسله وال دې له نړیوالو ترهګرو سره اړیکې پرې کړي او دارنګه په افغانستان کې د ترهګرو پټنځايونه پر هندوستان اغېزه کوي.
د هغه په خبره، د افغانستان د تېرو 20 کلونو د لاسته راوړنو ساتل او د افغان ښځو، ځوانانو او اقلیتونو هيلې او ارزوګانې ورته مهمې او احترام دې وشي.
د تېرې سې شنبې په ورځ د ملګرو ملتونو 15 ځواکمنو غړيو په هرات کې د دې سازمان پر دفتر بريد وغانده او د افغان ځواکونو او طالبانو ترمنځ د روانو جګړو په اړه يې اندېښنه څرګنده کړه.
د ملګري ملتونو امنیت شورا داسې مهال د افغانستان په اړه بېړنۍ غونډه کوي چې دمګړى د افغانستان په ځينو سيمو کې په ځانګړي توګه د هلمند په لښکرګاه او هرات کې د افغان ځواکونو او طالبانو ترمنځ جګړه روانه ده.