تاند (سه شنبه د اسد ۱۲) د افغانستان حکومت له ملګرو ملتونو وغوښتل چې د طالبانو پر کړنو دې سترګې نه پټوي.
د بهرنیو چارو وزیر محمد حنیف اتمر په کابل کې د افغانستان لپاره د ملګرو ملتونو د مرستندویه دفتر (یونما) له مشرې دیبورا لاینز سره د لیدنې پر مهال ویلي چې طالبانو پر ښارونو بریدونه ډېر کړي دي چې له دې سره جوخت ملکي مرګ ژوبله لوړه شوې ده او بشري خدمات درېدلي دي.
د ښاغلي اتمر په خبره، یوناما دې د طالبانو پر کړنو، سختو جګړو، ملکي مرګ ژوبلې او عامه تاسیساتو پر ورانولو سترګې نه پټوي او باید دا هر څه مستند کړي.
د ملګرو ملتونو مشرې هم په دې لیدنه کې په افغانستان کې روان تاوتریخوالی د جدي اندېښنې وړ بللی دی او ټینګار یې کړی چې طالبان باید تاوتریخوالی کم کړي او د سولې خبرې چټکې کړي.
د دیبورا لاینز په وینا د طالبانو د جګړو له امله د مرستندویه موسسو فعالیتونه درېدلي او ددوی ژوند له ګواښ سره مخامخ شوی دی.
په همدې حال کې د تېرې جمعې په ورځ/ د اسد اتمه/ په هرات ولایت کې د ملګرو ملتونو په دفتر برید کې یو افغان پولیس ووژل شو او یو شمېر نور ټپیان شول.
یوناما دغه برید په کلکو ټکو غندلی دی.