تاند (جمعه د اسد ۸مه) په هرات ولایت کې د ملګرو ملتونو د سیاسي استازولۍ (یوناما) د ولایتي دفتر په ودانۍ برید شوی دی.
یوناما نن جمعه/ د اسد ۸مه/ د یو ې د یوې اعلامیې په خپرولو سره ویلي چې په دې برید کې یو پولیس وژل شوی او یو شمېر نور پولیس افسران ژوبل شوي دي.
د اعلامیې له مخې، برید «د حکومت ضد عناصرو» کړی دی. معمولآ په دا ډول اعلامیو کې وسله وال طالبان د «حکومت ضد عناصر» بلل کیږي.
ملګري ملتونه وايي، په هرات کې چې په کومه سیمه کې د یوناما دفتر دی، نن د افغان پوځ او وسله والو طالبانو تر منځ د سختې جګړې شاهده وه.
په اعلامیه کې راغلي، «ملګري ملتونه په سملاسي توګه د برید په اړه د یو بشپړ انځور دترلاسه کولو په لټه کې دی او په همدې موخه له ښکلو اړخونو سره په اړیکه کې دی.»
د یوناما مشرې دیبورا لاینز دغه برید ډېر خواشینوونکی بللی او د وژل شوي افسر کورنۍ ته یې د تسلیت مراتب وړاندې کړي او ټپیانو ته یې د بیړنۍ روغتیا هیله کړې.
هغې زیاته کړې، «د ملګرو ملتونو په ضد برید د منلو نه دی او موږ یې په کلکه غندو. د وژل شوي افسر د کورنۍ سره خواخوږي ښکاره کوو او ټپي شویو ته عاجله روغتیا غواړو.»
ملګري ملتونه وايي په دې برید کې د ملګرو ملتونو کارکوونکو ته زیان نه دی رسېدلی.
دیبورا لاینز زیاته کړې، «ددغه برید ترسره کوونکي باید وپیژندل شي او حساب ته را کاږل شي. د ملګرو ملتونو پر ملکي کارکوونکو او دفتر برید د نړیوال قانون پراساس منع دی او کیدی شي جنګي جرم وبلل شي.»
د اعلامیې له مخې، په افغانستان کې ملګري ملتونه یو ملکي سازمان دی چې د سولې د هڅو پر ملاتړ، د ټولو افغانانو د حقونو پر بهتره کېدو او د بشر دوستانه او پرمختیايي مرستو په ترسره کولو تمرکز لري.
یوناما د افغانستان د محافظت عامه ادارې څخه مننه کړې چې د یوناما دفتر یې له برید څخه ژغورلی دی.
طالبانو بیا د یوې اعلامیې په خپرولو سره ویلي چې په هرات کې د یوناما دفتر خوندي دی او هېڅ ستونزه ورته متوجه نه ده.