تاند(يکشنبه د اسد ۱۰مه ) په جوزجان ولایت کې د افغان پوځ چارواکي وايي چې په دغه ولایت کې د طالبانو جګړه د بهرنيو ترهګرو له لوري رهبري کيږي.
د دوی په وینا په دغه ولایت کې پاکستانی متقاعد پوځي شیخ مطیع الله د طالبانو د جګړې مشري پر غاړه لري.
په جوزجان ولایت کې د ۲۰۹ شاهین قول اردو د دویمې لوا قوماندان ډګروال غني نظامي وایي چې په دغه ولایت کې د طالبانو د جګړې د مشرۍ ټولې چارې د همدغه پاکستاني پوځي پر غاړه دي.
ښاغلی غني زیاتوي چې په دغه ولایت کې د طالبانو په لیکو کې یوازې پاکستاني جنګیالي نه دي، بلکې اوزبیکستاني جنګیالي هم له طالبانو سره یو ځای د افغان حکومت پر ضد جنګیږي. د نوموړي په وینا اوزبیکستاني جنګیالي له خپلو کورنیو سره ددغه ولایت په درزاب ولسوالۍ کې اوسېږي.
درزاب ولسوالۍ اوسمهال د طالبانو په ولکه کې ده.
په جوزجان ولایت کې د بهرنیو ترهګرو د حضور خبره په داسې حال کې کیږي چې په دې وروستیو کې طالبانو د دغه ولایت په مرکز شبرغان کې خپلو بریدونو ته زور ورکړی دی.
بل خوا په بدخشان ولایت کې هم ځایي چارواکو د طالبانو په لیکو کې د بهرنیو ترهګرو د حضور خبر ورکړی دی.
په داسې حال کې د طالبانو په لیکو کې د بهرنیو جنګیالیو د شتوالي په تړاو رپوټونه زیات شوي دي چې طالبانو له امريکا سره د دوحې په هوکړه ليک کې ژمنه کړې وه چې د القاعدې په ګډون به له ټولو بهرنیو ترهګرو سره خپلې اړېکې پرې کوي.