تاند (یکشنبه د اسد ۳) د جوزجان امنیه قومانداني وايي چې د شبرغان ښار د جامع جومات خطیب مفتي رفیعالله پرون شنبه ماښام مهال د څو وسله والو کسانو له خوا په جومات کې د ننه د کلاشنیکوف په ډزو ووژل شو.
د امنیه قومندانۍ ویاند مسعود ندیم وايي، چې د دې قتل علت تر اوسه نه دی معلوم، خو په خبره یې د څېړنو لپاره یوه ډله مؤظفه شوې ده.
ښاغلي ندیم زیاته کړې، بریدکوونکي له سیمې څخه تښتېدلي دي او د پېښې په تړاو تر اوسه څوک نه دي نیول شوي.
د جوزجان د ارشاد، حج او اوقافو د ریاست چارواکي بیا وايي چې د شبرغان ښار د مولانا جلالالدین مېنې د جامع جومات خطیب یو بې پرې سړی و او له چا سره یې دښمني نه لرله.
مفتي رفیع الله په دې وروستیو کې په خپل مالي لګښت د نجونو او هلکانو لپاره یوه دیني مدرسه جوړه کړې وه.