تاند (یکشنبه د اسد ۳) د سپینې ماڼۍ ویاندې جین ساکي د یوه خبري کنفرانس پر مهال د طالبانو پر وروستیو څرګندونو غبرګون ښودلی دی.
نوموړې ویلي چې د افغانستان حکومت د امریکا ملاتړ له ځان سره لري او طالبانو ته په کار ده چې د جګړو له لارې نه بلکې د سولې او مذاکراتو پر مټ واک ته د رسېدو لارې چارې ولټوي.
ساکي زیاته کړې، افغانستان ته یوازې او یوازې د مذاکراتو او یوې سیاسي هوکړې ته د رسېدو له لارې دایمي ثبات راتللی شي.
د سپینې ماڼۍ ویاندې ټینګار کړی چې د افغانستان اوسنی وضعیت د اندېښنې وړ دی او طالبانو ته په کار ده چې جګړې کمې او مذاکرات چټک کړي، ځکه د اوسني وضعیت د پای ته رسولو یوازینۍ لار سوله او خبرې دي.