تاند (شنبه د اسد ۲) د امریکا ولسمشر جو بايدن د دوو ځانګړو فرمانونو په صادرولو سره په افغانستان کې د افغان کډوالو او امریکا ته د مهاجرت د ځانګړې ویزې د غوښتونکو د چارو لپاره ۳۰۰ میلیون ډالره منظور کړل.
په لومړي فرمان کې راغلي چې د دغو مرستو سل میلیون ډالر دې په افغانستان کې د روان وضعیت له امله په غیر منتظره ډول د بې ځایه شویو کډوالو د اړتیاوو او هم امریکا ته د مهاجرت د ځانګړې ویزې د غوښتونکو د چارو لپاره ځانګړې شي.
د دوهم فرمان له مخې، دوه سوه میلیون ډالره نور دې د ادارو او د امریکا د متحده ایالاتو د وزارتونو له منابعو څخه د ګډوالو، د جګړود قربانیانو او امریکا ته د مهاجرت د ځانګړې ویزې غوښتوونکو په ګډون د نورو هغو کسانو د خیر ښیګڼې د چارو لپاره ځانګړې شي، چې په افغانستان کې د روان وضعیت له امله زیامن شوي دي.
د دغو فرمانونو د توشیح سره سم او له افغانستانه د امریکايي ځواکونو د وتلو د بهیر د بشپړېدو په درشل کې د امريکا ولسمشر جوبايډن او ولسمشر محمد اشرف غني د جمعې په ماخوستن ټيلفوني خبرې وکړې.
ولسمشر غني وايي له جوبايډن سره د دواړو هېوادونو د بدلېدونکو خو دوامداره اړيکو په هکله غږېدلی دی.
ولسمشر غني همداراز ویلي چې د امريکا ولسمشر جوبايډن ډاډ ورکړی چې له افغان ځواکونو به د امریکا ملاتړ دوام ولري، ولسمشر غني پر خپل ټويټر پاڼه ليکلي چې پهدغو خبرو کې دواړو لورو د سولې او ټيکاو لپاره د افغانانو د اجماع پر اهميت ټينګار کړی دی.
We stressed on the importance of the Afghans coming together for peace and security. And reiterated the enduring partnership, continued diplomatic and economic support for the Afghan government, security forces and the importance of preserving the gains of the last twenty years.
— Ashraf Ghani (@ashrafghani) July 23, 2021
په دغو خبرو کې ويل شوي چې افغان ځواکونه د هېواد د ساتنې او دفاع وړتيا لري.
جوبايډن له ولسمشر غني سره په خبرو کې يو ځل بيا له افغان حکومت سره د واشګټن د ډیپلوماټيکو او اقتصادي همکاريو د ملاتړ خبره کړې او د امنيتي ځواکونو او د تېرو شلو کلونو د لاسته راوړنو ساتل يې مهم بللي دی.
سپینې مانۍ هم د یوې اعلامیې په خپرولو سره ویلي چې ولسمشر بایډن او ولسمشر غني د افغانستان پر حالاتو غږېدلي او دواړو مشرانو د دوامداره مشارکت لپاره خپلې ژمنې یو ځل بیا تازه کړي دي.