تاند (یکشنبه د سرطان ۲۷) امریکا یو ځل بیا په فاریاب ولایت کې د تېرې جون میاشتې په ۱۶مه د افغان کومانډویانو ډله ییزه وژنه وغندله.
په کابل کې د امریکا سفارت شارژدافیر راس ویلسن پر خپل ټویټر په یوه ټویټ کې لیکلي چې طالبانو په فاریاب ولایت کې جنګي جنایت ترسره کړی دی او دغه ډله باید د دې وحشیانه جرم پلټنه وکړي.
On June 16, the Taliban committed possible war crimes by murdering surrendering Afghan troops in Faryab. As @StateDeptSpox said, “it’s an atrocious act, it’s an outrageous sight &of course we condemn it.” This savage crime must be investigated &those responsible held accountable.
— Chargé d’Affaires Ross Wilson (@USAmbKabul) July 18, 2021
راسن وېلسن زیاته کړې، امریکا دا پېښه په کلکو ټکو غندي او دا وېرونکې پېښه نه بښل کېدونکی جنایت بولي.
نوموړي ټینګار کړی چې طالبان د دې پېښې مسؤل دي او باید څېړنه یې وکړي.
د ویلو ده چې د تېرې جون میاشتې په ۱۶مه په فاریاب ولایت کې ۲۲ افغان کومانډویان وسله والو طالبانو ته تر تسلیمېدو ورسوته وژل شوي دي.
له دې پېښې وروسته د سي ان ان خبري شبکې په خپل یوه راپور کې وویل، داسې اسناد یې ترلاسه کړي چې وسله وال طالبان ۲۲ افغان کومانډویان له تسلیمېدو وروسته په ډزو وژني.
دا پېښه شاوخوا یوه میاشت وړاندې د فاریاب په دولتاباد ولسوالۍ کې شوې.
په هغې ویډیو کې چې سي ان ان خپره کړې، په کې څو تنه افغان ځانګړي ځواکونه لیدل کېږي چې د طالبانو په محاصره کې دي او لاسونه یې پورته نیولي او وروسته په ډزو وژل کېږي.
د بخښنې نړیوال سازمان هم د طالبانو دا اقدام ټکان ورکوونکی او د نړیوالو بشري قوانینو خلاف بللی دی.
د دې سازمان غړې سمیرا حمیدي زیاته کړې، «موږ د دغه برید په تړاو د ډېر مشخص او جدي تحقیق او محاکمې ته د دغې پېښې د عاملینو د راکشولو غوښتنه کوو، که د افغانستان حکومت دا کار ونشي کولی نو موږ هیله لرو چې نړیواله ټولنه او د جرایمو نړیواله محکمه (ای سي سي) په دې مسله کې راښکیله شي او په اړه یې تحقیق او جدي چلند وکړي.»