تاند (یکشنبه د سرطان ۲۷) د افغانستان د اطلاعاتو او فرهنګ وزارت په ګڼو ولایتونو کې د جګړو زیاتوالي ته په اشاره د طالبانو لخوا د رسنیو په وړاندې محدودیتونو او د تاریخي اباداتو په وړاندې د پرتو ګواښونو په هکله اندېښنه ښيي.
د اطلاعاتو او فرهنګ وزارت سرپرست محمد قاسم وفايي زاده نن یکشنبه په کابل کې یوې خبري ناستې ته وویل چې ۵۱ خبریالان په خپلو ولایتونو کې د نا امنیو له امله کابل ته راغلي او ۷۱ نور د خبریالانو د خوندیتوب پروګرام له لارې د ویزې په اخیستلو سره له هیواده بهر ته تللي دي.
وفایي زاده زیاته کړه، «کومو سیمو ته چې طالب لاسرسی پيدا کړی دی، بدبختانه هغه پخوانی سیاست چې د رسنیو او بیان ازادۍ په وړاندې محدودیت دی مخته وړي.»
حمد قاسم وفايي زاده وویل، د هرات په شینډنډ کې میهن، په بغلان کې پیمان، په سمنګان کې سیمای صلح، بلخ کې نوبهار او په کندز کې جیحون راډیو د طالبانو تر فشار لاندې د دغې ډلې تبلیغات خپروي او د دې راډېوګانو ښځینه کار کوونکي یې په کورونو کېنولي دي.
د طالبانو ویاند ذبیح الله مجاهد بیا د افغان چارواکو دغه څرګندونې بې اساسه بللي او ویلي یې دي چې د دوی تر حاکمیت لاندې سیمو کې پر رسنیو محدودیت نشته او تاریخي ابدات هم له تخریب څخه خوندي دي.
د افغانستان د اطلاعات او فرهنګ ریاست د رسنیو او تاریخي ابداتو په هکله یادې څرګندونې داسې مهال کوي چې د افغانستان جګړه ییز حالات ډېر بدل شوي دي، خو د جګړو له شدت سره سره په دوحه کې پر سولې خبرې هم پیل شوي دي.
دا ځل د دولت د پلاوي مشري د ملي روغې جوړې عالي شورا مشر عبدالله عبدالله کوي او د طالبانو له خوا د دوی د دوحې د دفتر مشر ملا عبدالغني برادر د پلاوي په سر کې دی.
دواړو مشرانو پرون په پرانیستونکې غونډه کې ټینګار وکړ چې د سولې خبرې باید ګړندۍ او سیاسي جوړجاړي ته هڅې تېزې شي.