تاند ( شنبه، د سرطان ۲۴) له اوږده ځنډ وروسته یو ځل بیا د چین اورګاډي د افغانستان شمالي بندر ته سوداګریز توکي راوړل.
د افغانستان د رېل لارې د ادارې مسوولان وايي، دغه محموله کې شاوخوا ۵۱ کانټینره سوداګریز توکي شامل دي، چې په افغان سوداګرو پورې اړه لري.
سرچینه وایي، چې یاده محموله د یکشنبې په ورځ حیرتان بندر ته راورسېده.
د سرچینې په حواله په دې محموله کې الکترونیکي وسایل، روغتیايي توکي، اغوستونکي او نور سوداګریز توکي شامل دي.
مسوولان زیاتوي، چې د چین او افغانستان ترمنځ د غځېدلې رېل پټلۍ ستونزې حل شوې دي او پر دې لار به سوداګري منظمه او پراخه کړل شي.
د یادونې ده، چې تر دې وړاندې د ځینو ستونزو له امله له د دغه لارې تګ راتګ ځنډېدلی و، خو اوس له اوږدې مودې وروسته د افغان سوداګرو محموله له دې لارې افغانستان ته را ورسېده.
دا سوداګریزه محموله داسې مهال افغانستان ته رارسېږي، د افغانستان د بهرنیو چارو وزارت وايي، د چین د بهرنیو چارو وزیر وانګ یې له خپل افغان سیال، حنیف اتمر سره د شانګهای د همکاریو سازمان په چوکاټ کې د افغانستان د اړیکو ډلې د څلورمې ناستې افغانستان سره د هر راز مرستې ډاډ ورکړی.
د بهرنیو چارو وزارت په یوه خبرپآڼه کې ویلي، چې په دې لیدنه کې دواړو لوریو په دوه اړخیزو اړیکو، د افغانستان په سیاسي او امنیتي وضعیت، افغان سولې پروسې او یو شمېر نورو مسایلو خبرې وکړې.