تاند ( چهارشنبه، د سرطان ۲۳) د لغمان ولایت امنیتي چارواکي وایي، چې د دې ولایت د الینګار ولسوالۍ ملکي او نظامي مسوولان یې طالبانو سره د جوړ جاړي په تور زندان ته اچولي دي.
په نیول شویو کسانو کې د الینګار ولسوال، امنیه قومندان، د ملي اردو د کنډک درستیزوال او د ملي امنیت د امریت مرستیال شامل دي.
چارواکي وايي، چې که څه هم یادې ولسوالۍ ته هوايي او ځمکنۍ مرسته رسېدلې وه؛ خو دوی د جوړجاړي له مخې ولسوالي او مهمات طالبانو ته پرېښي دي.
د چارواکو په وینا الینګار ولسوالي نن سهار یادو کسانو له وسلو سره طالبانو ته پريښې.
په لومړیو کې د یاد ولایت چارواکو دا خبره نه منله خو نن یې تائید کړه چې د نیول شویو چارواکو د جوړجاړي له امله یاده ولسوالي طالبانو نیولې ده.
د لغمان والي په مشرۍ د یاد ولایت نظامي شورا هم پرېکړه کړې ، چې د الینګار ولسوالۍ ملکي او نظامي مسوولان، چې په لوی لاس یې ولسوالۍ او مهمات طالبانو ته پریښي باید زنداني شي.
د لغمان والي وایي نیول شوي څلور مسوولان اوس مهال په ملي امنیت ریاست کې ترې څېړنې روانې دي.
والي زیاتوي، چې ډېر ژر به په الینګار ولسوالۍ کې بېرته د قوتونو د ځای پرځای کولو په موخه اقدامات ترسره شي.