تاند ( یکشنبه، د سرطان ۱۹ مه ) هندي رسنۍ وایي، د باليووډ سینما ځوانې او مشهورې اداکارې عالیه بټ له دغې سینما وروسته امریکایي سینما هاليووډ ته اراده کړې او تمه ده راتلونکې کمه موده کې هلته هم کار پیل کړي.
د معلوماتو له مخې، عالیه بټ په هاليووډ سینما کې د فلمونو یا کار ترلاسه کولو لپاره د هغه ځای له مشهورې کمپنۍ WME سره تړون کړی دی.
د دې تر څنګ عالیه بټ په بالیووډ کې تازه د کرن جوهر په نوي راتلوونکي فلم (روکي اور راني کي پریم کهاني) کې هم د کار کولو اعلان کړی دی.
د عالیه ترڅنګ دې فلم کې د هند پیاوړی اداکار رنویر سینګ هم منځنی کردار لوبوي چې دا د کرن جوهر له ډېر وخت وروسته فلم دی چې نندارې ته به وړاندې شي.
عالیه بټ چې خپل شخصي پروډکشن هم لري، د خپل پروډکشن له خوا لومړنی فلم د (ډارلینګس) په نوم جوړوي چې د دې فلم کارونه یې هم پیل کړي دي.
همدا راز مشهور ډایریکټر سنجی لیلا بنسالي هم خپل راتلونکي فلم (ګنګو بايي کاټیاواړي) کې عالیه بټ ته مرکزي کردار ورکړی دی.
د معلوماتو له مخې، د دې فلم ثبت هم بشپړ شوی چې په نږدې موده کې به نندارې ته وړاندې شي.
دا په داسې حال کې ده چې هند کې د کورونا وبا له خپرېدو سره سم د بالیووډ سینما هم په ټپه ودرېده خو اوس تازه د دغې ناروغي په کمېدو سره یو وار بیا د فلمونو د نندارې ته وړاندې کېدو بازار ګرم شوی دی.