تاند ( جمعه، د سرطان ۱۸) د صنعت او سوداګرۍ وزارت مسوولان وايي، چې د افغانستان او پاکستان ترمنځ د سوداګرۍ او ترانزیت تړون د شپږو نورو میاشتو لپاره هموغځول شو.
یاد وزارت وايي، چې د اپټا تړون د غځولو پرېکړه د افغانستان د صنعت او سوداګرۍ وزیر نثار احمد غوریاني او د سوداګرۍ او پانګونې په چارو کې د پاکستان د صدراعظم ستر سلاکار رزاق داوود ترمنځ لاسلیک شو.
اپټا د سوداګرۍ او ترانزیت تړون د افغانستان او پاکستان ترمنځ په ۲۰۱۰ میلادي کال کې لاسلیک شو.
که څه هم دغه تړون د پنځو کلونو لپاره و، خو لا هم د دواړو هېوادونو تر منځ د باور وړ دی.
د معلوماتو له مخې د اپټا د تړون پر اساس افغانستان کولی شي، چې د پاکستان واګې او کراچۍ بندر له لارې هند ته خپل سوداګریز توکي صادر کړي او همداشان دغه تړون پاکستان ته اجازه ورکوي، چې د افغانستان له لارې منځنۍ اسیا ته صادرات وکړي.
د افغانستان د صنعت او سوداګرۍ وزارت د معلوماتو په اساس د اپټا د نوي تړون د تدوینولو کار ۹۵سلنه بشپړ شوی او د دواړو هېوادونو تخنیکي ډلې د دغه تړون د نهايي کولو پر سر کار پيل کړی دی.