تاند ( جمعه، د سرطان ۱۸) د افغانستان د بشري حقونو خپلواک کمېسیون یو ځل بیا د جګړې له ښکېلو اړخونو غوښتي، چې د بشر پالنې نړیوال اصول او د جګړې قوانین مراعات کړي.
د دې کمېسیون غړي او ویاند شکرالله مشکور ویلي، د جګړې هېڅ لوری اجازه نه لري چې له ملکي وګړو د ډال او له هستوګن ځایونو یې د سنګر په توګه استفاده وکړي.
د نوموړي په خبره هغسې چې د جګړې د قوانینو له مخې ټولګټي تاسیسات خوندیتوب لري، شخصي هستوګن ځایونه هم خوندیتوب لري او باید د جګړې د لورو له خوا تر بریدونو لاندې رانه شي.
د بشري حقونو د څار سازمان ویلي، چې وسله والو طالبانو د روانې میاشتې په پیل کې په کندز کې د یو شمېر خلکو کورونه له دولت سره د همکارۍ په تور سوځولي دي.
د مشکور په وینا په دې اړه هم دوی څېړنه کوي.
وسله والو طالبانو بیا د دې ادعا په غبرګون کې تر اوسه څه نه دي ویلي.
دا په داسې حال کې ده، چې په دې وروستیو کې په هېواد کې د جګړو له امله زرګونه کورنۍ بې ځایه شوي او خپلې مېنې ترې پاتې دي.
بې ځایه شوې کورنۍ وایي، وسله وال طالبان یې له کورنو د سنګر په توګه ګټه پورته کوي او دوی اړ دي څو د خپل ژوند خوندیتوب لپاره کلی او کورونه پرېږدي او کډې وکړي.