تاند ( چهارشنبه، د سرطان ۱۶) د افغانستان کرکټ بورډ راشد خان د ملي لوبډلې د شل اوریزه لوبو د لوبډلمشر او نجیب الله ځدراڼ د مرستیال لوبډلمشر په توګه وټاکل.
کرکټ بورډ وایي، راشد خان د کرکټ د نړۍ پېژندل شوی لوبغاړی دی چې د هغه تجربو او په تېرو کلونوکې د مشرولۍ وړتیا ته په کتو يې ټاکلی دی.
په ورته وخت کې راشدخان بیا په خپله فېسبوک پاڼه لیکلي: « زه په دې باور یم چې د یوې لوبډلې کپتان او مشر چې څومره ښه وي، لوبډله یې هم هماغومره ښه وي. افغانستان او د افغانستان ویاړلي بیرغ ماته د راشد خان نوم رابخښلی دی. د شلو اوریزو لوبو لپاره د کپتان په توګه زما نوی مسئولیت دا دی چې د خپل هېواد او خپلې لوبډلې لپاره په یو بل ظرفیت کې خدمت وکړم.»
د یادونې وړ ده چې په راتلونکي شل اوریزه نړیوال جام لوبو کې افغانستان د انګلستان، هندوستان او سویلي افریقا لوبډلو سره په (B) ګروپ کې ځای لري.
د دغه ګروپ دوه نورې لوبډلې به د نړیوال جام له لومړي پړاو لوبو وروسته دې ګروپ سره یوځای شي.
ټاکل شوې چې د شل اوریزه لوبو نړیوال جام به د روان کال په اکټوبر میاشت کې په عربي متحده اماراتو او عمان کې ترسره شي.