تاند ( یکشنبه، د سرطان ۱۳ مه ) د پکتیا ولایت رسنیز دفتر وایي، د دې ولایت مرکز ګردېز ښار کې ځای پر ځای شوي ماین چاودنې له کبله د ښځو او ماشومانو په ګډون څلور ملکي وګړي وژل شوې دي.
د دغه ولایت د رسنیو له دفتر څخه په خپره شوې خبرپاڼه کې راغلي چې یو ځای پر ځای شوي ماین نن یکشنبه/ ۱۳ /د سرطان مرکز ګردېز ښار د څلورمې امنیتي حوزې اړوند «رباط» سیمه کې د ملکي وګړو پر یوې سراچه ډوله موټر چاودلی دی.
د یاد رسنیز دفتر خبرپاڼه زیاتوي چې دغه ماین د طالبانو ډلې له خوا ملکي وګړو د تګ راتګ پر یوې فرعي لارې ځای پر ځای شوی و.
سرچینه وایي، دغه ماین چاودنه کې د دوو ښځو او یوه ماشوم په ګډون څلور تنه ملکي وګړي وژل شوې دي.
د پکتیا ولایت رسنیز دفتر یاده خبرپاڼه دغه راز وایي چې همدا نن یې د څلورمې امنیتي حوزې پولیسو له لوري د رباط په ساحه کې د طالبانو له لوري خښ کړل شوي څلور ماینونه کشف او له منځه وړي دي.
دا لومړی ځل نه دی چې د طالبانو له لوري د سړک غاړې ماین د ملکي وګړو پر موټر چاودنه کوي؛ مګر تر دې وړاندې هم د هېواد له بېلا بېلو ولایتونو د دا ډول چاودنو او پکې ملکي وګړو د مرګ ژوبلو راپورونه ورکړل شوې دي.