تاند (یکشنبه د سرطان ۱۳) د ولسمشر لومړی مرستیال امرالله صالح وايي چې طالبان نه شي کولی په افغانستان واکمن شي او نه هم یاده ډله د حکومت کولو وړتیا لري.
ښاغلي صالح پر خپل ټویټر لیکلي چې دوی اوسمهال د یووالي لپاره یو لوی فرصت ګوري ځکه چې په خبره یې، د هېواد د هرې سیمې خلکو خپلو ځایونو ته د افغان ځواکونو او کمانډویانو د ورتګ غوښتنه کوي.
I see a great & historic opportunity for unity. Every single community from all corners of the country asks Kabul for deployment of the army & commandos. This shows thirst 4 institutions & rule of law as people reject factionalism. Talibs won't be able to take Afg or rule. Never
— Amrullah Saleh (@AmrullahSaleh2) July 4, 2021
بلې خوا طالبانو تازه په خپلو خبرو کې ویلي چې د مې له لومړۍ نېټې راپه دېخوا یې د افغانستان په ۲۸ ولایتونو کې ۱۴۳ ولسوالۍ نیولې دي.
خو د افغانستان د کورنیو چارو وزارت د طالبانو له خوا په دې شمېر د ولسوالیو د نیولو ادعا ردوي او وايي چې د طالبانو دا ادعا د یوې ولسوالۍ په ټوله جغرافیه کې صدق نه کوي.
د دې وزارت ویاند طارق ارین وايي، د یو شمېر ولسوالۍ له ځینو سیمو افغان ځواکونه بل ځای ته تللي چې دا د سقوط په معنی نه ده.
د ښاغلي آرین په خبره، طالبان د هېڅ ولسوالۍ د ساتلو وړتیا نه لري او غړي یې په لېرې پرتو سیمو کې په پاشل شوي ډول پراته دي.
د کورنیو چارو وزارت ویاند وايي، هغو سیمو کې چې طالبانو پرمختګ کړی، شتون یې لنډمهالی او تل پاتې نه دی.