تاند ( یک شنبه، د سرطان ۱۳) ختیځ کې د ملي اردو چارواکي وایي، د دې ولایت په حصارک ولسوالۍ کې تېره شپه افغان ځواکونو د عملیاتو پرمهال ۲۳ وسله والو طالبانو ته مرګ ژوبله اړولې ده.
د ۲۰۱ سېلاب قول اردو مطبوعاتي مسوول صاحبزاده تاند وېب پاڼې ته وویل، چې په دې عملیاتو کې ۱۵ طالبان وژل شوي او ۸ نور ټپيان دي.
نوموړی دغه راز د یوه بل خبر له مخې وایي، د لغمان په الیشنګ ولسوالۍ کې افغان ځواکونو د عملیاتو پرمهال د طالبانو د سيمه ايزو قوماندانانو په ګډون ۵۳ تنو ته مرګ ژوبله اړولې ده.
سید مقصود صاحبزاده زیاتوي، دا عملیات د افغان هوايي ځواک په ملتیا نن سهار پر طالبانو ترسره شول، چې پرمهال يې د یادې ډلې د سیمه ایزو قومندانانو غزالي ، قاري هارون او توحيد په ګډون ۲۲ طالبان وژل شوي او ۳۱ يې ټپيان دي.
سرچینه وایي، په یادو دواړو عملیاتو کې د طالبانو درنې او سپکې وسلې له منځه وړل شوي دي.
وسله والو طالبانو بیا تر اوسه په دې اړه څه نه دي ویلي.