تاند (جمعه د سرطان ۱۱) د افغانستان حکومت یو ځل بیا ټینګار کړی چې پاکستان د طالب مشرانو لپاره خوندي پټنځایونه برابروي او همدارنګه د افغان جګړې مشري هم له پاکستانه کېږي.
د افغانستان د ولسمشرۍ ماڼۍ مرستیال ویاند محمد امیري رسنیو ته په استول شوي پیغام کې ویلي، سربېره پر دې چې د طالبانو کورنۍ او مشران په پاکستان کې ژوند کوي، بلکې د سوق و ادارې او پرېکړو مرکزونه یې هم په پاکستان کې فعال دي.
نوموړي د بېلګې په توګه د کوېټې شورا او د میرانشاه شورا نومونه اخیستي او زیاته کړې یې ده چې د پاکستان په جوماتونو کې د وسله والو طالبانو لپاره چندې ټولېږي او د طالبانو تبلیغات په منظم ډول اداره کېږي.
افغان چارواکي داسې مهال دغه څرګندونې کوي چې د پاکستان د کورنیو چارو وزیر څو ورځې مخکې تایید کړه چې د افغانستان په جګړو کې مړه او ټپي طالب جنګیالي پاکستان ته وړل کېږي او د دې ډلې مشران هم په دغه هېواد کې مېشت دي.
په دې وروستیو کې داسې راپورونه هم ورکول شوي چې له افغانستان څخه د بهرنیو ځواکونو د وتلو له اعلان سره سم د پاکستان په ښارونو کې د طالب جنګیالیو لپاره چندې ټولول زیات شوي دي.
د امریکا غږ راپور: پاکستان کې د طالبانو لپاره د مالي مرستو ټولول زیات شوي