تاند ( دوشنبه، د سرطان ۷) په کابل پوهنتون کې د چین په مالي مرسته د جوړېدونکي تدریسي ودانۍ او تالار چارې بشپړې شوې.
په کابل کې د چین سفیر وانګ یو نن په همدې مناسبت جوړو شویو مراسمو ته وویل، چې چين له اوږدې مودې راهيسې له افغانستان سره د زېربناوو د جوړولو برخه کې مرسته کړې او کوي یې.
وانګ یو دغه راز زیاته کړې چې هېواد به یې له افغانستان سره د کورونا پر وړاندې مبارزې او د سولې پروسې بشپړ ملاتړ ته هم دوام ورکړي.
چین د افغانستان یو له هغو مرستندویه هېوادونو شمېرل کېږي د بیارغونې په برخه کې ډېره مرسته کوي.
د کابل پوهنتون د کنفوسيوس پوهنځي تدريسي ودانۍ، د افغانستان د تخنيکي او مسلکي زده کړو ملي انسټيټيوټ، په کابل کې جمهوريت روغتون او په کندهار کې ميروېس روغتون یې د کارونو بېلګې دي.