تاند ( دوشنبه، د سرطان ۷ ) د بهرنیو چارو وزارت له لوري په خپره شوې اعلامیه کې راغلي چې حنیف اتمر د افغانستان لپاره د ایران له ځانګړي استازي ابراهیم طاهریان سره کتلي دي.
سرچینه وایي په دې لیدنه کې طاهریان پاکستان ته د خپل وروستي سفر په اړه اتمر ته معلومات ورکړي او ټینګار یې کړی، چې د ۳ واړو هېوادونو ترمنځ اړیکې باید پیاوړې شي.
طاهریان په دې لیدنه کې د ایران، افغانستان او پاکستان د درې اړخیز کنفرانس په اړه خپله طرحه هم بهرنیو چارو وزارت ته سپارلې ده.
هغه زیاته کړې، چې د افغانستان د روانې جګړې د ختمولو لپاره د سیمې د هېوادونو همغږي اړینه ده.
اتمر هم ویلي چې افغانستان له ټولو اړخونو سره د ښو اړیکو غوښتونکی دی او تمه لري، چې له ټولو هېوادونو سره یې اړیکې لا ژورې شي.
اتمر د سولې د راتګ او جګړې د ختمولو په برخه کې د ایران له هڅو مننه کړې او د لا همکارۍ غوښتنه یې کړې ده.
د سولې دا طرحه داسې مهال افغان لوري ته سپارل کېږي، چې بل لورته په کابل کې د امریکا پخواني سفیر راین کراکر په خپله یوه تازه مرکه کې ویلي طالبان پر سوله باوري نه دي او د لا ډېرو سیمو نیولو ته لېواله دي.
راین کراکر وایي د سولې روانو خبرو او لړۍ د افغانستان لپاره هېڅ راز ګټه نه ده لرلې او د جګړو په کمښت کې هېڅ مرسته نه ده کړې.
نوموړی وایي که پر سوله تمرکز و نه شي او افغانان خپلې ستونزې د خبرو له لارې حل نه کړي نو په دغه هېواد کې د کورنیو جګړو د دوام خطر شته او دا احتمال هم شته چې وضعیت نور هم ترینګلی شي.
هغه زیاته کړې چې د افغانستان روانه جګړه به یوازې په دې هېواد کې پاتې نه شي بلکې ګاونډي هېوادونه به هم زیانمن کړي له همدې امله د ټولې سیمې هېوادونو ته په کار ده، چې سولې ته د رسېدو په برخه کې له ټولو اړخونو سره همکاري وکړي.