تاند ( دوشنبه، د سرطان ۷) د ننګرهار ولایت په مرکز جلال اباد ښار کې د ودان خیریه موسسې د کارکوونکو پر موټر ماین چاودنه شوې.
د والي ویاند عطاالله خوږیاڼی وایي، پېښه د پنځمې ناحیې اړوند د پوهنې ریاست ښاري مدیریت سره نن سهار شوې ده.
نوموړی وایي په دې چاودنه کې یو تن وژل شوی او د یادې موسسې د دوه ښځینه کارکوونکو ترڅنګ ۴ تنه ټپيان دي.
خوږیاڼی زیاتوي، وژل شوی کس رېکشا چلوونکی دی او په ټپیانو کې یو ماشوم او بل موټر چلوونکی شامل دی.
نوموړی وایي، د ودان موسسې پر کارکوونکو دا چاودنه هغه مهال شوې کله چې دوی دندې ته پر لاره وو.
په ورته وخت کې روغتیايي مسوولان هم مني، چې د پېښې له ځایه ورته یو جسد او ۴ تپيان ور وړل شوي دي.
دوی وایي د ټپيانو حالت ښه دی او تر درملنې لاندې دي.
د دې چاودنې مسوولیت تر اوسه چا پر غاړه نه دی اخیستی.