تاند ( شنبه، د سرطان ۵) ملي دفاع وارت وایي، چې تېره ورځ ناوخته افغان ځواکونو د پکتیا میرزکې ولسوالي بېرته له طالبانو ونیوله.
په ورته وخت کې د یاد ولایت والي محمد حلیم فدایي وایي، چې وسله والو طالبانو د دې ولسوالۍ ودانۍ او ټول دولتي تاسیسات وران کړي.
د فدایي په وینا د وسله والو طالبانو جګړه یوازې د ولس پر خلاف ده.
د یادونې ده، چې یواځې په وروستیو درېیو ورځو کې افغان ځواکونو د پکتیا احمد اباد، سیدکرم او میرزکې او دغه راز د بغلان د دوشي او خانچارباغ ولسواليو د بېرته نیولو خبر ورکړی دی.
طالبانو که څه هم په دې اړه څه نه دي ویلي، خو د فاریاب په ګډون یې په یو شمېر نورو ولایتونو کې د تازه ولسوالیو د نیولو ادعاوې کړې دي.