تاند (سه شنبه د سرطان ۱) ولسمشر محمد اشرف غني ابراهیم رییسي ته د ایران د نوي ولسمشر په توګه د ټاکل کېدو مبارکي ورکړه.
د افغانستان ولسمشرۍ ماڼۍ وايي چې ښاغلي غني له ښاغلي رییسي سره بېګا شپه ټلیفوني خبرې وکړې او هغه ته یې په چارو کې د بریا هیله وکړه.
د ارګ په خبرپاڼه کې د ولسمشر غني له قوله راغلي چې افغانستان او ایران دوه داسې ګاونډي هېوادونه دي چې په خپلو کې ژورې تاریخي او فرهنګي اړیکې لري او په وینا یې افغان لوری تمه لري چې د ښاغلي رییسي په راتګ سره به دغه اړیکې لا پراخې شي.
د خبرپاڼې له مخې ابراهیم رییسي هم افغانستان د ایران ښه ملګری او ښه ګاونډي وباله او ټینګار یې وکړ چې د اړیکو د لا پراختیا لپاره به هڅه کوي.
د ایران د ولسمشرۍ په انتتخاباتو کې چې د شنبې ورځ/ د جوزا ۲۹مه/ یې نتیجه اعلان شوه، ابراهیم رییسي د دغه هېواد د نوي ولسمشر په توګه اعلان شو.