تاند ( سه شنبه، د سرطان ۱) ملګري ملتونه وايي، چې په تېر کال له شاوخوا ۸۵۰۰ ماشومانو په جګړو کې د سرتېري په توګه ګټه اخیستل شوې ده.
سرچینې په خپل یو تازه راپور کې ویلي، چې لا هم د نړۍ په ګوټ ګوټ کې وسله والې ډلې په خپلو لیکو کې ماشومان ګوماري او وسلې ورکوي.
د سرچینې د راپور په حواله په تېر ۲۰۲۰ز کال په ټوله نړۍ کې شاوخوا ۸۵۰۰ ماشومان د جګړو په لیکو کې استخدام شوي، چې له دې ډلې ۲۷۰۰ یې وژل شوي دي.
ملګرو ملتونو د جګړو په لیکو کې د ماشومانو ګومارل بشر ضد کړنه بللې او د دې چارې د مخنیوي غوښتنه یې کړې ده.
د ملګرو ملتونو په راپور کې ځينې افریقايي او اسیایي هېوادونه د هغو هېوادونو په کتار کې یاد شوي، چې وسله والې ډلې پکې ماشومان په خپلو لیکو کې ګوماري او د جګړو ډګر ته یې لېږي.