ن(دوشنبه د جوزا ۲۴مه) نن په ټول هېواد کې د ماشومانو د ګوزڼ یا پولیو ضد واکسین پیل شو.
عامې روغتیا وزارت، د روغتیا نړیوال سازمان او د ماشومانو لپاره د ملګرو ملتونو وجهي صندوق یا یونیسیف په ګډه د یاد واکسین د تطبیق کمپاین پیل کړی دی.
ټاکل شوې، د روانې جون میاشتې تر اولسمې نېټې شاوخوا نهه میلیونه او نهه لکه افغان ماشومان چې عمرونه یې له پنځو کلونو کم دی واکسین شي.
د عامې روغتیا وزارت له لوري په همدې اړه په خپره کړې اعلامیه کې د دغه وزارت د سرپرست وحید مجروح له قوله ویل شوي، له دریو میلیونو او دریو لکو زیات ماشومان به په یو شمېر سیمو کې د واکسین له اخیستلو محروم پاتي شي.
په اعلامیه کې له واکسین څخه د یاد شمېر ماشومانو د پاتې کېدو دلیل نه دی په ډاګه شوی، ډیر کله په هغو سیمو کې له واکسین کولو سره مخالفت ښودل کیږي چې د طالبانو تر واک لاندي وي.
پولیو یوه ساري ناروغي ده چې د ملا د تېر تر منځ مهمه عصبي رشته یا نخاع زیانمنوي او بلآخره د ناروغ د ګوزڼ سبب کیږي.