تاند (دوشنبه د جوزا ۲۴) د افغان سولې لپاره د امریکا د بهرنیو چارو وزارت ځانګړی استازی زلمی خلیلزاد د قزاقستان له چارواکو سره پر افغان سوله غږېدلی.
خلیلزاد د سولې په تړاو د پیل کړي سفر په ترڅ کې پرون یکشنبه د قزاقستان پلازمېنې ته رسېدلی دی او هلته یې له قزاق چارواکو سره تر لیدنې وروسته په یوه خبري ناسته کې وویل چې قزاقستان یې د افغان سولې پروسه کې همکارۍ ته هڅولی دی.
خلیلزاد د افغان سولې د پیاوړتیا لپاره د قزاقستان په ګډون د سیمې هېوادونو رول مهم بللی او وايي چې په افغانستان کې د سولې او ثبات د رامنځته کېدو او د سیمې د پرمختګ هدف ته رسېدو لپاره امریکا له نورو هېوادونو سره په ګډه کار کوي.
نوموړي وویل، «زه دلته د دې لپاره راغلی یم چې له چارواکو سره په دې اړه چې په ځانګړې توګه متحده ایالات او قزاقستان په ګډه او هم قزاقستان په یوازې سر د سولې د بهیر د پرمختګ او د اقتصادي ښې راتلونکې او د افغانستان له وګړو سره څه مرسته کولای شي، خبرې وکړم.»
د افغان سولې لپاره د امریکا ځانګړی استازی وايي، په داسې حال کې چې امریکایي ځواکونه له افغانستانه د وتلو په حال کې دي، خو امریکا به د دې هېواد تر څنګ ولاړه وي او په امنیتي او اقتصادي برخو کې به خپلو مرستو ته دوام ورکړي.
د یادونې ده چې خلیلزاد تر دې وړاندې لومړی کابل او بیا قطر ته د سفر پر مهال له افغان او قطري چارواکو سربېره په قطر کې د افغانستان حکومت د مذاکراتي پلاوي له غړیو سره هم خبرې وکړې.