تاند(شنبه د جوزا ۲۲) د بښنې نړیوال سازمان له افغان حکومت غوښتي چې په دې هېواد کې دې د کورونا ناروغانو لپاره د اکسیجن د نشتون ستونزه په جدي توګه حل کړي.
یاد سازمان ویلي، افغان حکومت باید د روغتیا نړیوال سازمان په همکارۍ د کورونا ضد واکسین او نور تجهیزات برابر کړي.
د یاد سازمان لهخوا په خپره شوې خبرپاڼه کې راغلي چې په افغانستان کې د کورونا مثبتې پېښې مخ په زیاتېدو دي او په وینا یې د تېر یو کال راهیسې افغان حکومت بېړنیو حالاتو سره د مبارزې لپاره کافي چمتووالی نه دی نیولی.
د بښنې نړیوال سازمان په داسې مهال له افغان حکومت د اکسیجن د برابرولو غوښتنه کوي چې په ډېرو روغتونونو کې اوسمهال د اکسیجن د نه شتون له امله ناروغان له ستونزو سره مخ دي.
بل لور ته بیا تېره ورځ ازبکستان هېواد له افغانستان سره د ۱۰۰۰ بالونه اکسیجن مرسته اعلان او نن سهار حیرتان بندر ته راورسېده.