تاند (شنبه د جوزا ۲۲) د افغانستان د حج او اوقافو وزارت دې هېواد کې په دیني مدرسو او جوماتونو کې د روغتیایي سپارښتنو د عملي کولو غوښتنه کړې ده.
ددغه وزارت له لوري په یوه اعلامیه کې راغلي، دا چې کورونا وبا انساني ټولنې سختې زیانمنې کړې دي نو د هېواد د دیني او علمي مرکزونو مسؤلیت دی چې د خلکو خوندي کولو ته پاملرنه وکړي.
د اعلامیې له مخې د جماعت لمنځونه دې په ازاده فضا کې ترسره کېږي، درسي حلقې دې د وضعیت تر ښه کېدو رخصت کړل شي، د جمعې په لمنځونو او خطبو کې دې ټولنیز واټن مراعات شي او د دستاربندۍ او دې ته ورته مراسمو له جوړولو دې ډډه وشي.
دغه وزارت له دیني علماوو او د مدرسو له استادانو غوښتنه کړې چې د کورونا وبا په هکله دې خلکو ته پوهاوی ورکړي او په دې توګه ددې وژونکې وبا د ختمولو لپاره له خپل ولس سره همکاري ډېره کړي.
ورته مهال د عامې روغتیا وزارت وایي، د کورونا ویروس درېیمه څپه د اوج کچې ته د رسېدو په حال کې ده او پېښې یې ورځ تر بلې زیاتېږي.
دغه وزارت د کووېډ-۱۹ساري ناروغۍ د مهارولو لپاره سر له نننه شنبه/ د جوزا ۲۲مه په ټول هېواد کې د اړوندو ادارو په همغږۍ جدي بندیزونه اعلان کړل.
د نویو بندیزونو له مخې باید د هېواد په سطحه ښوونیز او تحصیلي مرکزونه، د ودونو د تالارونه، ورزشي مرکزونه، کلپونه او حوزونه باید تړلي وي.
دغه راز عمومي ځایونو کې د ماسک تړل هم جبري شوي او د دولت هغه مامورین به له کورونو کار کوي چې له ۵۵ کلونو زیات عمر لري.