تاند ( دوشنبه، د جوزا ۱۷) د افغانستان د عامې روغتیا وزارت مسوولان وایي، په تېرو ۲۴ ساعتونو کې په ټول هېواد کې د کورونا وبا تازه ۱۵۸۲ مثبتې پېښې ثبت شوې دي.
یاد وزارت وایي، چې په همدې موده کې پر کورونا اخته ۵۶ تنه مړه شوي دي.
د دغه وزارت د وروستیو معلوماتو پر اساس تر اوسه په هېواد کې پر کورونا د اخته کسانو ټول شمېر ۸۲ زره ۳۲۶ ته رسېدلی.
سرچینه دغه راز وایي، چې تر دې دمه د مړو شویو کسانو شمېر بیا ۳ زره او ۲۵۱ ته رسېدلی دی.
د عامې روغتیا وزارت پر هېوادوالو غږ کړی، چې د کورونا وبا د درېیمې څپې په مخنیوي کې له دوی سره مرسته وکړي او روغتیایي لارښوونې عملي کړي.
د کورونا له امله د ملکي خدماتو د پاخه عمر مامورین ۲ اونۍ رخصت شول
د کورونا ویروس مثبتې پېښې په داسې حال کې زیاتې شوي، چې د هېواد روغتونونه د مصنوعي اکسیجن له کمښت سره مخ دي.
د روغتیایي برخې مسوولینو بیا ویلي، چې دوی هڅه کوي ترڅو دغه ستونزه حل کړي.
د کورونا مثبتو پېښو د مخنیوي په موخه افغان حکومت په یو شمېر ولایتونو کې ټول ښوونځي او پوهنتونونه د دوو اوونیو لپاره رخصت کړي او دغه راز یې په کابل کې ځینې بندیزونه هم ولګول.