تاند (یکشنبه د جوزا ۱۶) د بلخ امنیتي چارواکي وايي چې د دې ولایت د بلخ ولسوالۍ د امنیه قوماندانۍ مخې ته د موټربم چاودنې له امله دوه تنه افغان سرتیري وژل شوي او د ملکي وګړو په ګډون ۴۲ تنه نور سرتیري ټپیان شوي دي.
د بلخ د امنیه قوماندانۍ ویاند عادل شاه عادل ویلي چې دغه موټر بم چاودنه نن غرمه شاوخوا ۱۲ بجې شوې ده.
د عادل په خبره، “د چاودېدونکو موادو یو ډک موټر چې تر اوسه یې نوعیت لا معلوم نه دی، په زیات احتمال سره چې هاموي ټانګ به وي د بلخ ولسوالۍ د امنیه قوماندانۍ د ودانۍ مخته چاودنه کړې چې له امله امنیتي سرتیرو ته تلفات رسېدلي دي.”
وسله والو طالبانو د دغې موټربم برید مسؤلیت منلی او د ګڼو سرتیرو د مرګ ژوبلې ادعا یې کړې ده.
د راپورونو له مخې په دغه موټر بم چاودنه کې د سیمې خلکو ته هم ګڼ مالي زیانونه رسېدلي دي.