تاند — د خوست ولایت ځایي چارواکي وایي چې په دغه ولایت کې د وسله والو کسانو په دوو جلا بریدونو کې درې محصلین او دوه پولیس وژل شوي او د یوې ښځې په ګډون درې تنه ټپیان دي.
د خوست د امنیه قومندانۍ ویاند نجیب احمد وايي چې لومړۍ پېښه نن سهار شاوخوا نهه بجې د صبريو ولسوالۍ د يعقوبيو ښارګوټي ته څېرمه پر یوه موټر د وسله والو د برید له امله رامنځته شوې چې په پایله کې یې درې کسان چې محصلین و وژل شوي او یوه بله ښځه ټپي شوې ده.
د نوموړي په خبره، دویم وسله وال برید بیا نن سهار شاوخوا لس بجې د ټنیو ولسوالۍ په سره کوټ سیمه کې د پولیسو پر رنجر موټر شوی دی چې په نتیجه کې یې دوه پولیس وژل شوي او دوه نور ټپیان دي.
د نجیب احمد په خبره دا پېښه هغه مهال رامنځته شوه چې پوليس د ځنګل وهنې د مخنیوي په موخه د سره کوټ سيمې ته روان و.
تر اوسه د یادو بریدونو مسؤلیت کومې وسله والې ډلې پر غاړه نه ده اخیستې، خو پولیس وايي چې په دې هکله پلټې پیل شوي دي.