تاند ( پنج شنبه، د جوزا ۱۳) د افغانستان د برېښنا شرکت مسوولان وایي د برېښنا د پرچاوۍ له امله په هر ساعت کې تر درې میلیونو افغانیو پورې زیان ور رسېږي.
د یاد شرکت مسوولان زیاتوي، چې د ناپېژانده وسله والو له لوري د برېښنا د پایو نړول د اندېښنې وړ مسئله ده او امنیتي ادارې باید په دې اړه جدي اقدامات ترسره کړي.
د دغه ریاست د کارکونکو په خبره د برېښنا په هر ساعت پرچاوۍ برېښنا شرکت شاوخوا ۲،۷ میلیونه افغانۍ زیان ویني.
د سرچینې په خبره، د برېښنا هره پایه سل زره امریکایي ډالره لګښت لري او دوی اړ وي، چې د دغه پایو توکي له ترکیې یا ایران وارد کړي.
یاد شرکت د پایو نړول ملي خیانت بولي او پر امنیتي ادارو غږ کوي، چې د عامه تاسیساتو په ساتنه کې خپلې هڅې ګړندۍ کړي.
د افغانستان د برېښنا شرکت داسې مهال دا څرګندونې کوی، چې له تېرو دوو میاشتو راهیسې د برېښنا ۱۴ پایې د هېواد په یو شمېر سیمو کې په بمونو الوزول شوي دي.
تازه وړمه شپه هم د کابل په قره باغ ولسوالۍ کې د وارداتي برېښنا یوه پایه په بمونو والوزول شوه، چې له امله یې د مرکز په ګډون د یو شمېر ولایتونو برېښنا هم قطع شوې ده.