تاند(سې شنبه، د جوزا۱۱) راپورونه وايي چې د امریکا متحد ایالتونه به ژر په افغانستان کې خپله تر ټولو ستره اډه افغان امنیتي ځواکونو ته وسپاري.
د راپورونو له مخې، د امریکا پوځ به د بګرام هوايي اډه له یو شمېر هیلي کوپترو، زغرګاډو او ډېرو وسلو سره یوځای د افغانستان دفاع وزارت ته وسپاري.
مخکې د افغانستان دفاع وزارت ویلي و چې امریکا به د یو ملیارد ډالرو په ارزښت وسلې وروسپاري.
امریکا خپل یو شمېر تجهیزات ویجاړ کړي او یو شمېر نور یې له افغانستانه ایستلي دي.
د امریکا پوځ د کندهار د هوايي ډګر او شوراب په شمول څو نورې مهمې اډې د افغانستان امنیتي ځواکونو ته سپارلې دي.
د امریکا ولسمشر جو بایډن د اپریل په ۱۴ مه اعلان وکړ چې درست امریکايي پوځیان به د سپټمبر تر یوولسمې پورې له افغانستانه وباسي خو د دغه هیواد دفاع وزارت وايي چې د ځواکونو د ایستلو بهیر یې تر دې چټک دی او ښايي ټول پوځیان د جولای تر نیمايي له افغانستانه وباسي.
د امریکا مرکزي قوماندانۍ یا سنټکام د دوشنبې په ورځ ویلي و چې امریکا له افغانستانه د خپلو پاتې شاوخوا ۲۵۰۰ سرتېرو په سلو کې ۲۵ له افغانستانه ایستلي دي.