تاند — سیمه ییز چارواکي تاییدوي، چې په دوو جلا امنیتي پېښو کې په غزني کې یو تن قومي مشر او په کونړ ولایت کې د طالبانو د سرې قطعې یو قوماندان وژل شوي دي.
په غزني کې وژل شوی قومي مشر محمد عظیم مسلم جار نومېږي، چې یو وخت د دغه ولایت د اوبو رسولو چارو رئیس هم پاتې شوی و.
د غزني د والي ویاند واحدالله جمعه زاده وايي، وسله والو کسانو نن سه شنبه/ د جوزا ۱۱مه/ په مسلم جار باندې د ښار د دویمې امنیتي حوزې اړوند سیمه کې د خپل کور مخې ته برید کړی او هغه یې وژلی دی.
تراوسه د دغه برید مسؤلیت چا نه دی منلی، خو د غزني د والي ویاند دا د طالبانو کار بولي.
بلې خوا د کونړ امنیه قوماندان فرید الله دهقان وايي، په یوه ماین چاودنه کې د طالبانو د سرې قطعې یو قوماندان سلمان وژل شوی دی.
نوموړي زیاته کړې چې پر قوماندان سلمان تېره شپه د کونړ سرکاڼو ولسوالۍ د ګنجګل درې په کوټکي سیمه کې ماین چاودلی چې پر مهال یې خپله سلمان او یو ملګری یې وژل شوي.
طالبانو تر اوسه په دې هکله څه نه دي ویلي.