تاند( سه شنبه، د جوزا ۱۱) د ختیځ زون دیني عالمانو، قومي مخورو او یو شمېر مېرمنو په یوه ولسي غونډه کې پر وسله والو طالبانو غږ وکړ، چې د افغان وژنې د مخنیوي په خاطر دې په هېواد کې اوربند وکړي.
دیني عالمانو په خپلو خبرو کې په هېواد کې روان تاوتریخوالی د اندېښنې وړ وباله او پر وسله والو طالبانو یې غږ وکړ، چې په ټول هېواد کې سراسري اوربند وکړي او له افغان حکومت سره د بین الافغاني خبرو له لارې ستونزې حل کړي.
دوی زیاته کړه، جګړه هېڅ ګټونکی نه لري او یواځې د افغانانو د وژنې او وطن د ورانۍ لامل کیږي.
د ننګرهار والي ضیاءالحق امرخېل چې په دې غونډه کې یې ګډون کړی وو د حکومت په استازولۍ ډاډ ورکړ، چې د دیني علماوو او ولس هر ډول غوښتنو ته به رسیده ګي کوي.
د ختیځ زون دیني عالمان داسې مهال د جګړې د درېدو غوښتنه کوي، چې په دې وروستیو کې په هېواد کې جګړه تربل هر وخت تېزه شوې ده.
د یادونې ده چې له دې وړاندې هم د نړۍ سترو علماؤ هم افغانستان کې روانه جګړه حرامه بللې او په ځلونو له وسله والو طالبانو د اوربند غوښتنه شوې خو هغوی مثبت ځواب نه دی ویلی.