تاند(شنبه، د جوزا ۸) د پکتیکا د کرنې، اوبو لګولو او مالدارۍ ریاست چارواکي وایي، سږ کال به په دغه ولایت کې د زعفرانو ۱۰ ننداریزې کروندې جوړې شي.
د چارواکو په خبره، چې دا پلان یې د زعفرانو د لا پراختیا په خاطر نیولی دی.
د یاد ولایت چارواکو زیاته کړې، د زعفرانو د کښت، ګل ټولونې، اقتصادي ارزښت او پراختیا په خاطر یې دا هڅې د مرکز ښرنې، سروبي، جانیخېل، یوسفخېل، او خیرکوټ ولسوالیو کې د زعفرانو ننداریزو کروندو په جوړولو سره پیل کړي دي.
د کرنې او مالدارۍ وزارت ویاند اکبر رستمي ویلي، چې د زعفرانو دا لس ننداریزې کروندې به د پکتیکا د مرکز په ګډون په ځینو ولسواليو کې جوړې شي.
د رستمي په وینا، په پام کې ده چې وزارت په دغه ولایت کې د نورو ارزښت لرونکو محصولاتو تر څنګ د زعفرانو کرکیله هم پراخه کړي.