تاند — د غور ولایت د لعل او سرجنګل ولسوالۍ اوسیدونکو نن سهار د غور- کابل لویه لاره تړلې.
دوی د لارې تړلو دلیل د مرکزي لویې لارې امنیت ته پاملرنه نه بللې ده.
د غور د ولایتي شورا غړی عبدالحمید ناطقي وايي، دا اقدام یې ځکه کړی چې غږ یې تر مرکزي حکومته ورسېږي.
معترضینو د یوه پرېکړه لیک په خپرولو سره پردې لویه لاره د امنیت ټېنګولو او هم د فېروزکوه او لعل او سرجنګل ترمنځ لارې کې د دوو امنیتي پوستو د جوړېدو غوښتنه کړې.
دوی ګواښ کړی چې تر هغو یې غوښتنې نه وي منل شوي، لاره به نه پرانېستل کېږي.
په تېره یوه میاشت کې د غور – هرات او غور -کابل پر لارو ۷ مسافر د نامعلومو وسله والو له خوا وژل شوي.
وژل شوي کسان چې د لعل او سرجنګل ولسوالۍ اوسیدونکي و، حکومت دا د طالبانو کار بللی، خو طالبانو دا ادعا رد کړې ده.