تاند (دوشنبه د جوزا ۳) د ملي دفاع وزارت وايي، بغلان ولایت کې د طالبانو یو زندان مات او اته تنه نظامیان ترې راخوشې شول.
د دغه وزارت په خبرپاڼه کې نن دوشنبه/ د جوزا ۳/ راغلي چې افغان کمانډویانو تېره شپه د بغلان جدید ولسوالۍ اړوند عمرخېل کلي کې د طالبانو په یوه زندان چاپه ووهله او ۸ نظامیان یې ترې راخوشې کړل.
د ملي دفاع وزارت تر دې وړاندې هم د طالبانو د زندانونو د ماتېدو او ترې د افغان سرتېرو د راخوشې کېدو ادعاوې کړي.
طالبانو تر اوسه په دې هکله څه نه دي ویلي.
بغلان کې د طالبانو زندان پر داسې مهال ماتېږي، چې له څو اونیو راهیسې په دغه ولایت کې د افغان ځواکونو او طالبانو ترمنځ د سختو جګړو راپورونه ورکول کېږي.