تاند (جمعه د ثور ۳۱) د افغانستان د ملي دفاع وزارت وايي د میدان وردک ولایت جلرېز ولسوالۍ د بېرته نیولو په خاطر د وسله والو پر ضد پوځي عملیات پیل شوي.
ملي دفاع وزارت وروسته له هغه د عملیاتو د پيل خبره کوي چې نن سهار د جلرېز ولسوالۍ د سقوط راپورونه ورکړل شول.
د دفاع وزارت په خبرپاڼه کې راغلي، “نن وروسته له غرمې ۱:۴۵ دقیقې هوایي قواوو، د مېدان وردګو ولایت جلریز ولسوالۍ کې ترهګر طالبان په نښه کړل. پایله کې ۱۰ طالبان ووژل شول او ۱ ټپي شو.”
د خبرپاڼې له مخې په جلرېز کې د دولت د مخالفینو پر ضد عملیات دوام لري.
طالبانو تراوسه د دفاع وزارت د تازه پیل شویو عملیاتو په هکله کوم څه نه دي ویلي، خو د دغې ډلې ویاند ذبیح الله مجاهد نن سهار پر خپل ټویټر لیکلي چې د جلرېز ولسوالۍ مرکز او د امنیه قوماندانۍ ودانۍ یې نیولي دي.
نوموړي ادعا کړې چې په ولسوالۍ کې یو شمېر عسکر له دوی سره یو ځای شوي او یوه اندازه سپکې او درنې وسلې هم د دوی د جنګیالیو لاس ته ورغلي دي.
خو د کورنیو چارو وزارت بیا ویلي چې امنیتي سرتیرو له ولسوالۍ څخه تکتیکي شاتګ کړی دی.
د کورنیو چارو وزارت د ویاند طارق ارین په خبره: “د سقوط خبره مطرح نه ده، که طالبان نژدې شوي هم وي، په ولسوالۍ کې زموږ سرتیري حضور لري او د دښمن او طالب د ځپلو هڅې کوي.”